Injured	Killed
1	0

Date: 26 January 2013
Source: Banat

CEBU, Philippines –  Kritikal ang kahimtang sa usa ka ulitawo  human  kini pusila  didto  sa  kawayanan sa barangay Casili, lungsod sa Consolacion   sa miaging  buntag.

Ang biktima mao si Michael Tibon, 19, ulitawo apan adunay gikapuyo nga babaye, nga  taga Purok 1 sa barangay Cubacub, dakbayan sa Mandaue.

Samtang  ang suspetsado  nailhan usab  nga  si Dexter Suico, hingkod, minyo ug molupyo sa maong dapit ,ug giingon nga maoy tag-iya sa kawayanan nga gisum-ok sa biktima.

Si PO2 Johnaskie  Romero sa kapolisan sa maong lungsod nga nahinabi sa Banat News miingon nga kuyog sa biktima sa pagsum-ok sa kawayanan ang higala niini nga si Ruel Plantar, hingkod ug silingan sa biktima sa barangay Cubacub.

Apan  wala  kini  motug-an  kun  unsay  ilang tuyo didto  sa kawayanan.

Dugang pa niya nga nasayran  nila  gikan  kang   Plantar   nga sa didto  na  sila  sa kawayanan  kalit  lang   mitumaw  ang  suspek  kinsa misangpit  sa ngalan  ni Michael  dayong  pusil makaupat  ka  higayon  niini.

Si Plantar miingon nga human sa maong pagpamusil dali nga milayas ang suspetsado.

Ang  mga  molupyo  sa maong  lugar  maoy  misakwat  sa biktima  ug  mihatod  niini  ngadto  sa Vicente Sotto Memorial Medical Center sa dakbayan sa Sugbo.

Si  PO2  Romero miasoy nga   ang suspetsado   makadaghan  na  nga  mipadangat  sa mulo  niini  ngadto  kanila  kalabot  sa   mga  kawayan  niini nga gipunayan  lang  og  kawat. 

Busa  gituohan  ni PO2 Romero  nga malagmit  naupsan  na  sa pailob   ang suspek   hinungdan  nga  dihang  misum-ok  ang  biktima  ngadto  sa kawayan, gipusil  kini.

Sa pagkakaron  padayon  pang  gipangita  sa  kapolisan  ang  suspetsado  ug  gipaabot  ang  tukmang  kiha  nga  isang-at  sa biktima  batok  kaniya. (/WC) (BANAT NEWS)