| Injured | Killed |
|---|---|
| 1 | 0 |
Date: 02 February 2013
Source: Banat
CEBU, Philippines – Nalandig sa tambalanan ang giingong tulisan ug nasikop usab ang kauban niini human mapusili sa usa ka jailguard sa dalan P. del Rosario, dakbayan sa Sugbo sa miaging gabii.
Ang napusilan mao si Alen Espinosa, 26, nga taga Calamba kinsa giingong nanulis uban sa iyang ig-agaw nga si Ralphy Sayat, 22 , nga taga Sambag l, pulos sa dakbayan sa Sugbo.
Samtang ang miangkon nga biktima sa maong pagpanulis ug namusil mao si Prison Guard 1 Antonio Capacio, usa ka jailguard sa Cebu Provincial Detection Rehabilitation Center (CPDRC).
Matud pa ni Capacio nga paatubang siya nga motrabaho sakay sa usa ka jeep nga pasaheroan dihang pag-abot sa eskina P.del Rosario ug Osmeña Boulevard kalit lang nga mideklarar og hold-up ang ilang kasakay nga sila si Espinosa ug Sayat.
Gihulagway ni Capacio nga samtang ang usa mideklarar og hold-up ang usa usab maoy nanguha sa bag sa mga pasahero ang uban nakuhaan sa cellphone.
Apan dihang siya nay giduol kay kuhaon ang iyang bag, iya kini gilayog ug dunggabon na unta siya, apan sa kahadlok nga maabtan og polis mibiya kuno kini ug midagan.
Busa matud pa ni Capacio nga nakalugar siya sa paglanit sa iyang .38 kalibre nga revolver ug iyang gimandoan sa pagpahunong, apan misutoy hinuon kini og dagan.
Hinungdan nga iya kining gipusil ug naigo si Espinosa sa walang bahin sa lawas ug bitiis.
Unya giagakay kini ni Sayat, apan tan-aw ni Sayat nga siya maoy isunod sa pagpusil, mikaratel kini og dagan ug gibiyaan si Espinosa ug mao usay pag-abot sa mga tanod sa barangay Kalubihan.
Si Sayat kinsa misakay dayon og taxi nasikop sa kapolisan didto sa ilang balay.
Giangkon niini nga siya maoy chapter leader sa grupong Alpha Kappa Rho sa ilang dapit
Gihatud sa tambalanan si Espinosa samtang si Sayat gibalhug dayon sa karsel ug nagpaabot sa tukmang kaso nga ipasaka batok kanila.
Samtang si Capacio nakapakita usab og mga papeles nga legal ang iyang pagdala og armas.(WC) (BANAT NEWS)