Injured	Killed
0	0

Date: 04 May 2013
Source: Bombo Radyo

DAVAO CITY – Mibati ug kahadlok ang mga residente sa Purok Lagtik, Brgy. Amor Cruz, Kapatagan Laak, Compostela Valley human nga gipabusikad sa mga New People’s Army (NPA) ang landmine, alas-5:30 sa hapon samtang sakay sa ilang KM truck ang tropa sa 60th IB sa Philippine Army .

Sumala ni Jojo Alegrado usa sa mga residente sa nahisgutan nga lugar, wala matud pay namatay sa mga sundalo ug nakaangkon lamang kini ug gasgas sa ilang kalawasan.

Gikanayon sab ni Jojo nga mihiklin na matud pa ang pipila ka mga residente sa lugar human nga nahitabo ang maong insidente tungod sa ilang kahadlok nga mobalik sa ilang lugar ang tropa sa mga rebelde.

Gikumpirma sab ni Police Senior Inspector Estrello Ramiso ang station commander sa Laak Municipal Police Station nga gawas sa pagpabusikad ug landmine sa tropa sa mga rebelde, gi-snipe sab sa mga NPA ang detachment sa militar nga nahimutang duol usab sa nahisgutang Barangay.

Kahinumduman nga puno ug mga sundalo ang maong sakyanan apan walay grabe nga naangol human ang pagbusikad sa landmine nga gipahimutang kilid lamang sa dalan.

Gikanayon sab sa opisyal nga human ang nahitabong insidente, naglusad gilayon ug hot pursuit operation ang tropa sa kasundalohan ug kapulisan.

Gimandoan sab sumala pa ang kapulisan ni Provincial Director Cascolan nga luyo sa gipahigayon nga pagpangharass sa mga rebelde, kinahanglan nga mas pahugtan pa ang pagmonitor sa lugar ilabi na nga nagsingabot na ang adlaw sa pinili-ay.