Injured	Killed
0	1

Date: 21 July 2013
Source: Pilipino Star Ngayon

CEBU, Philippines – Napalgang patay ang usa ka gidudahang tomboy nga gituohang gilugos una pa gitusak og dunggab og icepick pasado alas-5 kagahapon sa kaadlawon diha sa dalan J. Luna barangay Mabolo dakbayan sa Sugbo sa usa ka bakanteng luna atbang lang sa Mabolo Police Station. Ang biktima gibana-banang nagpangidaron og 20 ngadto sa 24-anyos, ug nagsuot og itom nga t-shirts ug blue nga jersey shorts. Samtang ang pamuhok niini nilaki. Matud pa nga usa ka Ramil Noynay, residente sa maong lugar maoy nakadiskubre sa patay’ng lawas samtang kini padung unta nga malibang sa maong dapit. Sumala pa ni Noynay, nabantayan niya ang misiwil nga tiil sa usa ka tawo diha sa kalibonan maong iyaha kining gisusi ug nakurat siya nga usa diay kini ka babaye nga wala nay kinabuhi. Dali siyang midagan tabok sa dalan padung sa Mabolo Police Station ug gipahibalo ang iyang nakita. Sa pakisusi sa kapolisan sa Homicide Section inabagan sa mga imbestigador sa Mabolo Police Station ilang nasuta nga susama sa nabun-og ang nawong sa biktima ug duna kini daghang samad dinunggaban nga gidudahang inagian sa icepick. Si SPO1 Victor Ruel Ayuman ang imbestigador sa Homicide Section mipadayag usab nga nagduda sila nga gipahimuslan ang biktima tungod kay nahubo na ang shorts ug panty niini. Duna say timailhang buhi pa ang biktima dihang giguroy kini sa maong dapit tungod kay nakakupot man kini sa mga sagbot nga nangalarot nga nagpabilin pa sa iyang mga nagkumkom nga kamot. Gisusi pa kung tuyong misum-ok sa kalibonan ang biktima aron motubag sa sugo sa lawas ug posibleng duna nay laing tawo nga nag-una diha sa dapit nga nagtubag usab sa sugo sa lawas ug maoy mihimo sa krimen. Ang maong dapit matud pa gihimong kalibangan sa pipila ka mga residente duol sa maong sapa ingon man sa mga drayber sa mga pasaheroan nga mohunong sa maong dapit. Narekober sa kapolisan ang usa ka tsinelas nga gituohang iya sa biktima ug laing sandal nga panglalaki nga gidudahang iya usab sa suspek. Hangtod ning pagbalita padayon pang gipaabot ang tagtungod sa biktima tungod kay wala pa man kini mailhi ug kasamtangan kini nga anaa sa Surelife Funeral Homes. (BANAT NEWS)