Injured	Killed
0	1

Date: 17 January 2013
Source: http://www.sunstar.com.ph/superbalita-cagayan-de-oro/balita/2013/01/17/tanod-gipusil-patay-263401

PATAY ang usa ka barangay tanod human gipusil sa iyang pasahero kagahapon mga 10:30 sa gabii sa Barra, lungsod sa Opol, Misamis Oriental.

Giila ang biktima nga mao si Jeremias M. Catalan alyas Panong, 37, taga Zone-4, Barra susamang lungsod, ug usa ka barangay tanod sa maong barangay ug driver sa motorized sikad.

Si Senior Police Officer 1 Eva Española sa Opol Police Station nga nahinabi sa Sun.Star SuperBalita niingon nga sa ilang inisyal nga imbestigasyon namasahero ang biktima niadtong tungora dihang misakay ang usa ka wala mailang lalaki sa likod nga bahin sa sikad ug pila ka minuto sa ngitngit nga bahin kalit lang niining gipusil makadaghan nga higayon si Catalan.

Nakaambak pa si Catalan apan giayo kini og pusil sa suspek kinsa dali nga nisibat human sa insidente. Nakapangayo pa og tabang ang biktima.

Ang asawa niini niingon nga samtang ilang gitabang ang iyang bana nakasulti kini nga usa ka ‘maranao’ ang mipusil kaniya.

Nakaangkon og upat ka samad sa liog ang biktima ug laing duha sa tiyan nga bahin niini.

Gidala kini sa Northern Mindanao Medical Center (NMMC) apan mga ala 1:00 sa kadlawon kagahapon nakabsan kini sa iyang kinabuhi.

Girespondehan sa kapolisan ang krimen ug nahipos sa crimescene ang cartridge ug slug sa kalibre .45. Gidala na ang mga nahipos sa PNP Crime laboratory alang sa masusing eksamin.

Matud ni Española nga motibo sa krimen ang padayon pa nga gisuta sa imbestigador. Migawas ang taho nga daw gidumtan usab ang biktima.