Injured	Killed
0	0

Date: 17 June 2013
Source: Bombo Radyo

KALIBO, Aklan – Arestado ro sangka Swedish national matapos nga atakehon ro tatlong pulis it Boracay Tourist Assistance Center (BTAC) nga nagdakop kana sa D’Mall sa isla it Boracay.

 

Nakilaea ro suspek nga si Peter Quill, 55, taga-Sweden ag temporaryong naga-istar sa Barangay Manoc-manoc sa nasambit nga isla.

 

Nakataeana raya nga pagakasuhan it disobedience in person in authority ag direct assault bangud sa pag-atake sa mga kapulisan.

 

Base sa report, natabu ro insidente matapos nga magresponde ro tatlong pulis nga sanday PO3 Dionel Quitong, PO1 James Victor Abierra ag PO1 After John Embalsado sa sangka komosyon nga nag-eontad sa nasambit nga lugar nga kon sa siin naabutan nanda ro suspek nga nakikipag-away sa sambilog pang foreign national.

 

Matapos nga maawat sa away hay gindaea it mga pulis ro daywa sa Boracay District Hospital, apang padayun sa gihapon ro pag-wala it suspek. Kat pugngan, inatake sigon kara ro mga pulis pinaagi sa pag-angkit, pagsipa ag pagbayo sa mga raya.

 

Sa makaron ro Swedish national hay nakakulong eon sa detention cell it BTAC.

 

Nasayuran nga nagapangatubang man ro suspek sa kasong RA 9262 ukon Anti Violence Against Women and Their Children Act of 2004.