Ginpamilit ni Reden Tomulog, residente it Brgy. Agbalogo, Makato, Aklan nga sanda eamang ro nagbulig ag nagturo sa lugar kon siin pwede nga i-eubong ro bangkay ni Leah Lee Cipriano, 26-anyos ag residente it Brgy. Estancia, Kalibo ko Mayo 21 it gabi-i.

 

Nagpanindugan man si Reden nga owa nanda ginhimuslan ro biktima bangud nga bangkay eon raya ag nakasueod sa sako kat gindaea kana it tatlong eaeaki nga nakasakay sa kulay puea nga pick-up. 

 

Suno kana nga imao ro magiging yabe agud nga masolbar ro krimen sa oras nga makita nana it oman ro mga eaeaki nga matuod nga naghimo it krimen.

 

Ginsaysay nana nga bandang alas-9:00 it gabi-i ko Mayo 21 hay nakabaton imao it tawag halin kay certain “Emy” nga magatau sigon kana it “project” ag nagkasugot nga magakita sa nasambit nga barangay.

 

Nasayuran nga si Emy hay nakilaea nana sa Caticlan, Malay, Aklan bangud sa anang trabaho. 

 

Ginpahayag ni Reden nga bilang ahente it color roof products hay insigida imao nga kumagat sa offer ni Emy. Apang owa nana ginaeauman nga ro pagpa-eubong sa bangkay it babaye ro ginapatrabaho kana kara. 

 

Samtang, ginkumpirma ni Reden nga nagahimo imao makaron it kaugalingon nga tikang agud nga mabuligan ro mga otoridad nga madakpan ro mga responsable sa krimen. 

 

Mag-eowas kay Reden Tomulog, limang iba pa nga sanday Geneses Puod, Edwardo Macawili Jr, Lindley Yufano, Salcedo Tomulog ag ro nagtau it anang affidavit of confession nga si Edward Macawili ro ginkasuhan it rape with homicide sa Aklan Prosecutor’s Office. 

 

Suno kay Reden nga sanday Puod ag Edwardo Macawili Jr. eamang ro anang nakaibahan kat makipagkita sa mga eaeaking nagdaea sa bangkay ni Leah Lee.