Injured	Killed
2	7

Date: 24 January 2013
Source: http://bomboradyo.com/news/regional-news/cebuano-news/149940-sundalo-patay-2-samdan-ug-7-sa-npa-sa-north-cotabato-encounter

KIDAPAWAN CITY – Usa ka sundalo ang napatay ug duha ang naangol sa engkwentro sa mga miyembro sa New People’s Army (NPA) alas-2:10 sa hapon niadtong Miyerkules didto sa probinsiya sa Cotabato.

Gibutyag ni 6th Infantry (Kampilan) Division Public Affairs Chief,Colonel Dickson Hermoso nga nagpatrolya ang mga sakop sa 57th Infantry Battalion Philippine Army sa Barangay Cabilao, Makilala, sa diha nga ilang na-engkwentro ang gibana-banaan nga 30 ka NPA ubos sa Front Committee 53.

Milungtad ngadto sa duha ka oras ang sinukliay og mga bala tali sa duha ka pundok gamit ang mga tag-as nga matang sa armas.

Miatras ang mga rebelde sa diha nga nahiabot ang dugang pwersa sa militar ug mga miyembro sa Citizen Armed Forces Geographical Unit (CAFGU).

Matud ni 602nd Brigade Commander, Colonel Ademar Tomaro nga usa sa mga sakop sa 57th IB ang napatay ug duha ang naangol apan dili pa nila mapagawas ang bansagon niini gumikan wala pa nila mapahibalo ang ilang pamilya.

Pito sab ang nasamdan sa mga NPA ug upat ang nadakpan nga anaa sa usa ka balay tambalan og padayon nilang gi-imbestigahan.

Suma ni 57th IB Commander Colonel Noel Dela Cruz nga gisulod sa mga NPA ang Brgy Cabilao aron kolektahon ang ilang gipangayo nga revolutionary tax ngadto sa mga sibilyan.

Sa kasamtangan padayon nga gilutos sa militar ang mga rebelde nga nanagan paingon sa bukiron nga parte sa utlanan sa North Cotabato ug Davao Del Sur.

Gatusan sab sa mga sibilyan ang namakwet sa kahadlok nga maipit sa kagubot. (Bombo Garry Fuerzas)