Nilooban ng mga hinihinalang miyembro ng acetylene gang ang sangay ng Cebuana Lhuillier sa kahabaan ng McArthur Highway sakop ng Dalandanan, Valenzuela City.

Ayon kay Valenzuela Police officer-in-charge Senior Superintendent Roderick Armamento, binutas ng tinatayang nasa apat na suspek ang pader sa likurang bahagi ng pawnshop kaya nakapasok ang mga ito.

Narekober sa loob ang mga kagamitan na kalimitang ginagamit ng tinaguriang acetylene gang.

Hindi pa naman matukoy kung may natangay sa sanglaan.

Nabatid na nagrenta sa katabing apartment ang mga suspek nitong Lunes at nagbayad ng three months advance.

Walang nakuhang identification ang may-ari ng apartment kaya wala pang lead ang mga awtoridad.

Gayunman, titingnan ng mga pulis kung nahagip ang mga ito ng closed-circuit television (CCTV) camera. Report from Johnson Manabat, Radyo Patrol 46