Injured	Killed
0	1

Date: 24 January 2013
Source: Bombo radyo; Wednesday, 23 January 2013 00:20

BACOLOD CITY – Patay ang sales manager ng isang distributor company matapos barilin ng security guard ng isang warehouse sa lungsod ng Bacolod kaninang hapon.

Nagtamo ng malubhang sugat sa ulo si Valeriano Agbulos, 52, at sales manager ng Red Maple na nakabase sa Metro Manila na kaagad nitong ikinamatay.

Batay sa inisyal na imbestigasyon ng Police Station 2 ng Bacolod City Police Office, napag-alaman na pumunta kaninang hapon si Agbulos sa warehouse ng Universal Harvester Inc. sa Bredco Port sa nasabing lungsod upang maningil ngunit nagkataon na lunch break ng mga empleyado.

Habang kumakain ang mga empleyado, laking gulat ng mga ito nang makarinig ng isang putok kung kaya’t agad silang lumabas kung saan kanila ng nakita ang nakahandusay at duguong katawan ng biktima.

Katabi naman ng bangkay ni Agbulos ang nakatayong guwardiya ng warehouse na si Mart Barrientos kung saan hawak-hawak pa nito ang kaniyang armas na isang 9mm caliber pistol.

Na-recover sa crimescene ang isang empty shell at isang hindi pa napaputok na bala ng nasabing armas.

Sa ngayon, patuloy ang hot pursuit operation ng mga pulis sa nakatakas na suspek.

Hindi pa naman natukoy ang motibo sa krimen ngunit pinagdududahan na nagtalo ang biktima at ang guwardiya.