Injured	Killed
0	1

Date: 28 May 2010
Source: Sun Star Davao

USA ka sakop sa paramilitary ang gipatay sa mga rebeldeng New People’s Army (NPA) sa alas 5:00 sa hapon niadtong Miyerkules didto sa Sitio Malapangi, Barangay Malabog, distrito sa Paquibato, siyudad sa Davao.

Si PO2 Rufino Hernandez, imbestigador sa Paquibato Police Station, nag-ila sa biktima nga mao si CAA Isidro Dora, 41, nagpuyo sa Barangay Paquibato Proper.

Matud ni Hernandez sa iyang investigation report nga ang biktima gipusil sa makadaghan nga higayon sa mga rebelde gamit ang M16 armalite rifle.

Ang biktima giingon nga namatay dayon sa maong pagpamusil apan wala na gidetalye kung unsa ang tuyo sa biktima didto sa nahitaboan sa krimen.

Sayo niini, gikapinusilay sab sa militar ang mga NPA sa alas 4:20 sa hapon niadtong Miyerkules didto sa Sitio Lawaon, Barangay Sibulan, distrito sa Toril, siyudad sa Davao.

Si PO3 Ferdinand Rojas sa Toril Police Station nagbutyag sa iyang spot report nga gikasugat sa militar ang 30 ka mga sakop sa NPA didto sa maong lugar mao nga nahitabo ang 30 minutos nga pinusilay.

Nasayran nga nagpatrolya ang usa ka platoon ug usa ka section sa mga scout rangers nga gipangulohan nila 1Lt Juaquin ug 1Lt De Guzman apan nakasulod sila sa mga kampo sa nga NPA.

Giingon nga nagpahulay ang mga NPA sa napulo ka mga payag sa maong lugar apan dihang nalupig sila sa binakbakay dali silang mibiya sa mga payag.

Nakuha sa militar ang usa ka landmine, daghang mga bala sa armas, mga pagkaon ug subersibong dokumento nga gipanag-iyahan sa mga NPA.

Gikataho nga walay nasamdan sa militar apan dunay mga nasamdan sa NPA sanglit dunay mga dugo nga nakita sa dapit nga ilang giagian.

Mga rebelde gilutos na karon sa militar didto sa kabukiran sa distrito sa Toril. (AD)