Injured	Killed
0	1

Date: 27 January 2013
Source: http://www.sunstar.com.ph/superbalita-davao/balita/2013/01/27/purok-leader-gipatay-265064

KIDAPAWAN CITY — Patay ang usa ka purok leader human gipusil sa riding in tandem alas 4:40 sa hapon niadtong Biyernes didto sa probinsiya sa Cotabato.

Giila ang biktima nga mao si Hermino Lim, 49, minyo ug molupyo sa Purok 3, Barangay New Janiuay, Mlang.

Gibutyag ni North Cotabato Provincial Director Danilo Peralta nga nahitabo ang pagpamusil samtang nagtindog lang ang biktima atbang sa iyang bay.

Nasayran nga kalit mibutho ang duha ka wala mailhing tawo dayon gipusil ang biktima gamit ang kalibre .45 nga pistola.

Patay gilayon si Lim nga naigo sa iyang dughan ug nawong samtang ang mga suspetsado abtik nga misibat sakay sa XRM nga motorsiklo nga walay plaka paingon sa wala matino nga dapit.

Walay nakaila sa pamilya ug silingan sa biktima ngadto sa mga mamumuno sanglit pulos sila naghelmet ug abtik nga misibat sa nahitaboan sa krimen.

Suma sa mga paryente ni Lim nga sa wa pa siya gipatay, nakahisgut pa siya nga dunay mga tawo nga naghulga nga patyon siya, apan wala niya gisulti kon kinsa nga grupo.

Sa kasamtangan, blangko pa ang kapulisan sa mga tawo nga maoy mipatay sa biktima mao nga padayon pa ang ilang imbestigasyon. (Edgardo Fuerzas)