Injured	Killed
0	1

Date: 05 March 2013
Source: Bombo Radyo

ILOILO CITY – Nagsungka na sa otoridad ang pulis nga nakaluthang-patay sa isa ka barangay tanod sa Brgy. Wari-Wari, New Lucena, Iloilo.

Ang pulis ang ginkilala nga si PO3 Angelino Lusaya, assigned sa Crime Laboratory sang Police Regional Office 6 (PRO6) samtang ang biktima ang ginkilala naman nga si Joan Suguan y Sobrepeña, residente sang nasambit nga lugar.

Sa interview sang Bombo Radyo Iloilo kay Police S/Insp. Jojo Tabaloc, hepe sang New Lucena Municipal Police Station, hubog ang barangay tanod sang magpadulong sa balay sang pulis kag nanghangkat sang away.

Ginpahayag nga gintinguhaan ini sang pulis nga pahipuson apang sang wala nagpamati, ginkuhaan sang shot gun kag ginluthang.

Naigu sang bala ang biktima sa kilid nga ginkamatay sini samtang nagpalagyo naman ang pulis apang kaina sang aga nagsungka man ini sa headquarters sang PRO6 sa Camp Martin Delgado.