TODAS ang isang pintor matapos bugbugin at pagsasaksakin ng basag na bote ng isang welder sa Barangay Hulong Duhat, Malabon City, Linggo ng gabi.

Dead on arrival sa Tondo Medical Center si Bobby Cruz, 44-anyos, ng Dinnis St., Hulong Duhat, sanhi ng mga tinamong bugbog sa mukha at saksak sa katawan.

Arestado at nahaharap sa kasong murder ang suspek na si Zeus Mansilungan y Ramjo, 22, binata, welder at taga-Sulucan St., ng nasabi ring barangay.

Ayon kay Agnes Imperial, 44, live-in partner ng biktma, nagulat na lamang siya nang biglang may kumalabog sa pintuan. Nang kanyang buksan ay nakitang duguan ang biktima habang ang suspek ay nakita niyang nakatayo at may hawak ng basag na bote na ginamit na panaksak.

Mabilis na tumakas ang suspek habang dinala ang biktima sa nasabing pagamutan subalit sa daan pa lamang ay binawian na ng buhay.

Sa isinagawang follow up operation ng mga awtoridad ay nasakote ang suspek at dinala sa presinto.