PATAY ang isang Pinoy escort, habang natangayan naman ng P100,000 halaga ng alahas at cash ang kasama nitong dalawang British nang holdapin at paputukan ng  pitong armadong lalaki sa Brgy Balubal, Cagayan de Oro.

Kinilala ang dalawang foreigner na sina Michael Hatcher at Nigel Cosans, pawang taga-Inglatera, habang patay naman ang kanilang escort na si Melanio Labarda Jr.

Nabatid na natagpuan ang bangkay ni Labarda sa isang bangin matapos binaril ng mga suspek.

Lumalabas na nakikipagnegosasyon ang mga banyaga sa mga suspek ukol sa gold bars transaction subalit sa hindi inaasahan ay nauwi sa ”double cross” ang negosasyon.

Lumalabas din na habang sakay ng Isuzu Crosswind ang mga biktima ay bigla na lamang silang hinarang ng mga suspek at dinala sa magubat na lugar.

Tinututukan namang anggulo ng awtoridad ang robbery at homicide sa insidente.