Injured	Killed
0	3

Date: 21 February 2013
Source: Remate.ph feb21, 2013

PINAGTATAGA muna bago sinunog ang tatlong miyembro ng pamilya sa Purok 16, Upper Dumugnay, Barangay Los Angeles sa Butuan City, hinala ng pulisya away sa lupa ang dahilan.

Base sa salaysay ni Ramil Saknanas, 14, apo at pamangkin ng mga biktima, bandang alas-10:00 ng umaga kahapon nang umalis siya upang bisitahin ang kanyang lolo’t lola.

Ngunit pagbalik ni Ramil ay nagulantang na lamang siya nang datnan niyang sunog ang bahay at nakita ang bangkay ng mag-asawang Antonio Saknanas, 87; Encarnacion, 72, at tiyuhin nitong si Reynaldo, 40, pawang magsasaka at residente ng nasabing lugar.

Base sa imbestigasyon ng Butuan City Police Station-4, pinaslang muna ang mga biktima bago sinunog dahil sa nakitang malalalim na mga taga sa leeg ng tatlo.

Itinuturo naman ni Joseph Saknanas, 37, anak ng mag-asawa, ang dalawang pamangkin niya na sina Rene at Cipriano, kapwa binata at residente rin ng naturang barangay, na responsable sa pamamaslang.

Ayon kay Joseph, nagbanta umano ang mga suspek sa mga biktima na papatayin dahil sa away sa niyog at lupa nitong nakalipas na linggo.

Nagsasagawa ng imbestigasyon ang pulisya at patuloy pa rin ang paghahanap sa responsable sa pamamaslang.