Injured	Killed
0	0

Date: 08 August 2013
Source: Pilipino Star Ngayon

MIDSAYAP, North Cotabato, Philippines – Isa na namang malakas na pagsabog ang gumulantang sa mga residente makaraang puntiryahin ng grupo ng kalalakihan ang isang pawnshop sa bayan ng Midsayap, North Cotabato kahapon ng madaling-araw.

Sa inisyal na ulat ni P/Supt Reinante Delos Santos, hepe ng Midsayap PNP na inilagay ang improvised explosive device (IED) sa ilalim ng upuan ng M-Lhuillier Pawnshop sa kahabaan ng Sto. Niño Street sa nabanggit na bayan.

Dahil sa lakas ng pag­sabog ay nawasak ang harapang bahagi ng pawnshop at mga salamin ng ilang tindahang malapit sa nasabing lugar.

Bagama’t walang na­suga­tan sa pagsabog, nagdulot naman ito ng takot sa mga kawani ng dxMA-FM104.1 Wow Radio na nasa ikalawang palapag  kung saan nabasag ang mga gamit nito kaya nag off-air  sandali ang nasa­bing radio station.

Samantala, ayon naman kay North Cotabato PNP director P/Senior Supt. Danny Peralta, bago ang pagsabog ay nakatanggap ng text messages ang security forces na may susunod na pambobomba.

Dahil dito ay umalerto ang pulisya at militar kung saan inilatag ang checkpoint subalit wala namang nangyaring pambobomba pero kahapon ng madaling-araw ay may sumabog sa bayan ng Midsayap.

Inaalam naman ng mga awtoridad kung may kaugnayan ang insidente sa magkasunod na bombing incident sa Cagayan de Oro City at Cotabato City noong nakalipas na linggo.