Injured	Killed
0	0

Date: 05 June 2013
Source: Banat

CEBU, Philippines – Nakurat ang  mga trabahanti sa Palawan Express Pera Padala  diha sa dalan Soriano sa barangay Mabolo ning siyudad sa Sugbu human kalit silang gitionan og armas ug gitulis sa duha ka armadong tawo atol sa pagpangabli nila kagahapon sa buntag.

Ang maong branch nga nahimutang sa dalan Soriano barangay Mabolo dakbayan sa Sugbu dili layo sa Mabolo Police Station. Ang pagtulis sa maong establisamento gikasagmuyo ni Mayor Michael Rama tungod sa kaduol lang niini sa maong presinto ug mimando dayon og dinaliang imbestigasyon.

Mao pay pagpangabli nila ni Grace Flores ug ang ilang cashier nga si Jovan Angot sa ilang roll-up door dihang giduol sila sa duha ka mga lalaki ug mideklarar og tulis dayong mando kanila nga pasudlon ug ipakuha ang ilang kwarta.

Matud pa nga gibaharan sa duha ka tulisan ang mga biktima nga patyon kung dili mohatag sa ilang gipangayo. Nakuha sa mga tulisan ang P150 mil nga cash, laptop, tulo ka cellphone ug tulo ka wallet.

Way nakabantay sa mga tawong naglabay-labay sa establisamento tungod kay atoa man sa sulod nahitabo ang pagpanion. Gibanabanang dili moabot 100 ka metros ang gilay-on sa pawnshop gikan sa police station.

Ang kapolisan sa Mabolo Police, miesplikar nga  ang una nilang nadawat nga impormasyon sayop. Diha lang kini nakorihian dihang dunay laing concerned citizen nga mikorihir ug mihatag sa saktong impormasyon.

Apan sa ilang pag-abot sa nahitabo wala na diha ang mga tulisan. Ang hepe sa Theft and Robbery Section (TRS) Insp. William Alicaba, mipadayag nga local boys lamang ang miigo sa maong buhatan.

Matud pa ni Alicaba nga sa ilang pakisusi sa dapit, gawas nga walay gwardiya wala usab kini Closed Circuit Television (CCTV) camera nga makatabang unta sa imbestigasyon.

“Their security was so poor,” kini maoy nakita ni Alicaba sa lugar. Dugang pa ni Alicaba nga ang establisamento mismo, hilabihan nga kahuyang sa bungbong nga kun adunay kawatan nga buot mosulod yano ra kaayong maguba.

Dako usab ang pagduda ni Alicaba nga posibling taud-taud nang nagbantay ang duha ka kawatan sa lugar aron masuta kun unsaon nila sa pagtulis sa maong buhatan.

Apan si Mayor Rama mihulagway nga usa ka insulto ang gihimo sa mga tulisan kay duol kini kaayo sa Mabolo Police Station. Si Rama miingon nga adunay posibilidad nga ang mga tulisan dili taga dakbayan sa Sugbo ug nga wala sila masayud nga ang balay-patigayon nga ilang gitulis nahimutang duol ra sa police station.

Miingon ang mayor nga mahimo usab nga ang maong pagpanulis gitumong aron nga pakauwawan ang mga polis sa Mabolo nga wala makaresponde dayon sa hitabo.

Ang traffic officer nga si Emmanuel Gelig nga maoy mipara sa motorsiklong gisakyan sa duha igo lamang nga gi-menoran apan dihang giduol na unta kini, mipabulhot kini sa pagpadagan.

Apan wala usab makaklaro si Gelig sa plaka sa motorsiklo nga gisakyan sa duha tungod sa kahanap niini.(BANAT NEWS)