Injured	Killed
0	0

Date: 05 December 2013
Source: Pilipino Star Ngayon

MANILA, Philippines – Nilimas ang mga ma­mamahaling kagamitan ng isang pamilya ng may walo hanggang labindalawang armadong lalaki na nanloob ng kanilang bahay sa Paco, Maynila, kahapon ng umaga.

Sa idinulog na reklamo sa MPD-Station 5 ng mga biktimang sina Rowena Chua, 55; Marvin Chua, 32, isang Purchasing Supervisor; Rhea Chua Cabochan at Randolf Lim Chua, pawang residente ng Peñafrancia corner Sagat  Sts., Paco, Maynila, sa pagitan ng alas-7:00 hanggang alas-7:30 ng umaga umano naganap ang panloloob habang ipinaparada umano ni Randolf Chua ang kanilang sasakyan sa harapan ng bahay nang biglang lumitaw ang mga suspect.

Agad itong hinila papasok sa loob ng bahay at saka iginapos maging ang lahat ng mga kapamilya nito bago naghalughog.

Mabilis umano ang pang­yayari nang tangayin ang mga kagamitan ng nasabing pamilya na tinatayang nagkakahalaga ng P600,000 at saka nagsitakas ang mga suspect.

Saka lamang kinalas ng mga biktima ang mga gapos sa mga kamay nila at paa at nagsuplong sa kanilang barangay at sa pulisya.