Injured	Killed
2	1

Date: 17 January 2013
Source: http://www.sunstar.com.ph/superbalita-davao/balita/2013/01/17/organizer-gipatay-263394

USA ka tawo ang namatay samtang laing duha ang nasamdan human gipangluba alas 2:30 kagahapon sa kaadlawon, Huwebes.

Ang insidente nahitabo sa Waling Waling Road, Barangay Buhangin Proper, siyudad sa Davao.

Sa maong hitabo, patay gilayon si Liezel Alvios, 26, minyo, residente sa Zone 7, San Vicente, Barangay Buhangin.

Nasamdan sab sila Jason Baldo Sampan, 29, barbero, taga San Vicente, ug Ronald Bucay Equibal, 23, ulitawo, taga Panabo City.

Base sa spot report sa Buhangin Police Station, nasayran nga dunay gihimong kalingawan sa nahisgutang dapit atol sa kapistahan sa patron nga si Sto. Niño.

Apan dunay nahitabong wala pagkasinabtanay sa panag-indigay sa kanta nga gidumala ni Alvios ug kalit lang siyang giduol sa duha ka mga lalaki.

Mga suspek giila sa kapulisan nga sila Ling Ling Misoles ug Singkaw Misoles, pulos hamtong ang pangedaron, pulos residente sa nahisgutang dapit.

Sumala pa nga nasuko sila Ling Ling ug Singkaw ug nakiglalis kang Alvios.

Misulay og uwang sila si Sampan ug Equibal sa naglalis, apan gidunggab hinuon si Sampan sa aping ug ulo samtang si Equibal giduslak og kutsilyo sa tuong kamot sa mga suspek.

Wala na kadagan si Alvios ug gidunggab siya sa dughan hinungdan sa iyang kamatayon.

Human sa hitabo, misibat dayon palayo sa dapit ang duha ka mga suspek.
Daling gidala sa Southern Philippines Medical Center (SPMC) ang mga biktima apan si Alvios gideklara sa mga personahe sa Central 911 nga dead on arrival.

Sila si Sampan ug Equibal nagpaalim pa karon sa ilang mga nahiaguman nga samad sa SPMC samtang ang patay nga lawas ni Alvios gihaya na sa ilang balay.

Gipalawman karon ang imbestigasyon sa Buhangin PNP aron madakpan ang duha ka mga suspetsado.