PADAYONG giukoy karon ang tawong nagpaluyo sa tinguhang pagpatay sa usa ka opisyal sa Autonomous Region in Muslim Mindanao.

Ang opisyal nga gipusil ug kritikal ang kahimtang giila nga si Bai Cabayan Bacar Provincial Agrarian Reform Officer (Paro) sa probinsiya sa Maguindanao.

Si Bacar sab ang Undersecretary for operation sa Department Agrarian Reform (DAR) Armm.

Sa taho gikan sa Criminal Investigation and Detection Group (CIDG-Armm) nasayran nga banda alas 3:20 sa hapon, Mayo 31, samtang sakay ang biktima sa iyang pick-up gikan sa siyudad sa Cotabato paingon sa parang Maguindanao, nahitabo ang insidente.

Samtang naglawig sa dalan, mihapit una ang gisakyan sa biktima sa usa ka tindahan sa Jose Lim Street aron mopalit og tinapay.

Wa damha, miduol ang nag-inusarang suspek, gipusil siya gamit ang kalibre .45 nga pistola.

Abtik sab nga misibat ang suspek paingon sa wala matino nga direksyon human masiguro nga nalup-og na ang biktima.

Maayo na lamang nga may nagpatrolyang pulis, gilutos ang suspek, malampuson kining nasignit.

Ang biktima, lakip drayber niini nga si Joel Panoy nga samdan sab sa pagpamusil dali nga gisapupo sa mga mirespondeng pulis, gidala sa Cotabato Regional and Medical Center, giatiman pa sa mga doktor.

Si Cotabato City Police Director Senior Superintendent Willie Dangane nagtuo nga dunay kalabutan sa trabaho sa biktima ang nahitabo.

Gidugang ni Dangane nga dili pa nila ikabutyag ang bansagon sa suspek gumikan kay nagpadayon pa ang ilang imbestigasyon aron madakpan ang mga tawo nga maoy nagsugo aron patyon ang biktima. (Edgardo Fuerzas)

Gipatik sa mantalaang SuperBalita Davao Hunyo 2, 2010.