Injured	Killed
1	1

Date: 31 July 2013
Source: Bombo Radyo

ILOILO CITY – Dead on arrival sa ospital ang officer in charge sang Rusco Motors sa Brgy. Bayuyan, Estancia, Iloilo matapos ginluthang sang duha ka lalaki sa sulod sang ila opisina kaina sang aga.

 

Ang biktima nga si Christopher Montaño, 33-anyos sang Barangay Lumbia, Estancia, ang naigu sang bala sa tiyan, tiil kag butkon.

 

Sa interview sang Bombo Radyo kay Police S/Insp. Lorenez Losaria, hepe sang Estancia PNP, magapatigayon pa kuntani sang morning prayer ang biktima upod ang mga empleyado sini sa trabaho sang hinali lang ginsulod sang duha ka suspetsado kag ginluthang ang biktima.

 

Nasalabat man ang isa sa mg empleyado nga si Elmer Estrada, 26-anyos sang Negros Occidental nga nag-angkon sang pilas sa abaga kag gindala sa ospital sa Roxas City, Capiz.

 

Sa imbestigasyon sang mga pulis, antes ang insidente, nakabaton na sang death threat ang biktima paagi sa text message.

 

Gindula na sang mga pulis ang motibo nga hold-up bangud wala man nagdeklarar ang mga suspetsado sang hold-up bisan pa may cash nga P300,000 sa opisina sang matabu ang krimen.

 

Nagpalagyo ang mga suspetsado sakay sa motorsiklo sang isa sa mga empleyado sang kumpaniya kag pag-abot sa Barangay Cano-an sa nasambit nga banwa, nagsakay sa isa ka kotse nga nagahulat sa ila.

 

Nagapati ang mga pulis nga personal ang motibo sang mga suspetsado ukon may labot sa trabaho sang biktima.

 

Na-recover naman sa crime scene ang apat ka empty shell sang .45 caliber pistol.