USA ka lalaki nadala sa ospital human gipusil sa wa mailhing mga suspek didto sa Purok 7, Urban, Barangay, Salvacion, siyudad sa Panabo.

Giila ang biktima nga si Jemmy Tinga, hamtung ang panuigon, ug molupyo sa Barangay Casig-ang, lungsod sa Sto. Tomas, Davao del Norte.

Sa report gikan sa Davao del Norte Police Provincial Office nasayran nga pasado alas 7:00 sa gabii niadtong Sabado nahitabo ang pagpamusil.

Samtang didto sa balay sa iyang bayaw ang biktima sa nahisgutang dapit, miabot ang wa mailhing suspek, way daghang istorya gipusil siya gamit ang wa matinong kalibre sa armas.

Nahiagum og samad pinusilan sa kalawasan ang biktima nga dali sab nga gitabang ug gidala sa Carmen District Hospital sa lungsod sa Carmen aron mapatambalan.

Apan tungod sa grabeng samad niini, gibalhin siya sa Davao Regional Hospital sa siyudad sa Tagum.

Human sa pagpamusil mga suspek abtik nga misibat padulong sa wa matino nga lugar.

Kapulisan sa siyudad sa Panabo mihimo na og dugang imbestigasyon sa hitabo aron masayran ang motibo, ug suspek sa pagpamusil. (Marvin Pineda)

Gipatik sa mantalaang SuperBalita Davao Hunyo 2, 2010.