Giila ang biktima nga si Erdy Racines, hamtung ang panuigon ug molupyo sa siyudad.

Sa report gikan sa Tagum City Police Station nasayran nga nahitabo ang pagpamusil pasado alas 5:00 sa hapon niadtong Biyernes.

Nag-drive sa iyang motor ang biktima nga dunay plate number LS-2272 gikan sa downtown ug kauban niya ang wa pa mailhing lalaki.

Wa damha nga gisundan diay sila sa mga suspek nga lulan sa motor kinsa mipusil sa biktima dihang nakakita na og higayon.

Nakahimo pa sa pagpadagan og kusog ang biktima sa iyang motor mao nga gigukod siya sa suspek.

Pag-abot didto sa may Energy Park sa Barangay Apokon, gipusil sa mga suspek ang wa mailhing angkas sa biktima kinsa naigo sa batiis ug natagak gikan sa motorsiklo.

Samtang si Racines mipaturatoy og padagan sa iyang motor paingon sa Barangay Madaum.

Igo lamang gyud nga nakaabot sa atubangan sa Coop A sa Purok Timog, Barangay Madaum, nahagba na ang biktima.

Ang wa pa mailhing angkas sa biktima gidala sa Davao Regional Hospital sa Barangay Apokon aron mapatambalan.

Narekober sab sa mga otoridad gikan sa biktima ang usa ka bundle nga tag P1,000 ug tig P500 nga gisud sa bag.

Apan nasuta nga ang ibabaw lamang sa nahisgutang mga binandol ang tinuod nga kwarta, samtang mga ginupit nga papel ang uban.

Gisusi sa kapulisan kun sakop ba sa Budol-budol Gang ang biktima tungod sa nakitang binandol nga papel sa iyang posisyon. (Marvin Pineda)

Gipatik sa mantalaang SuperBalita Davao Mayo 31, 2010.