Injured	Killed
0	0

Date: 30 July 2013
Source: Banat

CEBU, Philippines – Usa ka lalaking nagpailang sakop sa media ang gidakop sa kapolisan sa Waterfront Police Station human ireklamo sa duha ka mga tawo tungod sa pagpang-blackmail niini ngadto kanila.

Ang nasikop sa kapolisan mao ang usa ka Mervin Figuracion Seven, 30, taga Basak-Pardo ning dakbayan.  Siya gireklamo nila ni Michael Unay ug Michelle Munez, taga dakbayan sa Mandaue.

Sa pasiunang imbestigasyon sa kapolisan nasayran nga ang duha ka biktima nagpatabang sa kapolisan sa Waterfront Police Station human sila makadawat og text message gikan sa suspetsado nga nanghulga kanila nga ipublikar sa tanang mantalaan sa Sugbo nga sila adunay unsettled accounts sa Globe Telecoms.

Gipadayag usab ni Seven nga gikinahanglan siyang hatagan sa duha ka biktima og P2 mil aron dili niya dayunon ang pagpublikar sa ilang unsettle account.

Tungod niini usa ka entrapment operation ang gimando ni Chief Insp. Wildemar Tiu diha sa Legaspi Extension sa barangay San Roque, Cebu City.

Matud pa sa hepe sa kapolisan sa Waterfront Police Station nga ang suspetsado kanhi empleyado sa usa ka collection firm nga konektado sa maong communication company apan sukad niadtong tuig 2012 natangtang kini sa trabaho.

Gani, ang manager mismo sa maong collection firm ang mipadala og suwat ngadto sa buhatan ni Tiu nga nagkanayon nga dugay nang wala sa ilang buhatan ang maong suspetsado.

Nakuha gikan sa suspek ang usa ka hinimo-himong press identification card nga may nakasuwat nga Philippine Daily News nga maoy gigamit niini sa pagpangilad.

Kasong extortion ug estafa ang posibleng atubangon sa suspetsado nga kasamtangan karong gitanggong sa Waterfront Police Station. EIM (BANAT NEWS)