Injured	Killed
0	0

Date: 30 November 2013
Source: Bombo Radyo

BACOLOD CITY – Naalarma ang mga pumuluyo sang Brgy. Old Sagay, ciudad sang Sagay matapos ginreport nga may tatlo ka pump boat nga nagasakay sang mga pirata ang nagdungka sa ila baybayon kag nagpangluthang kagab-i.

 

Nakabaton sang tawag ang Sagay police gikan sa nagahilibion nga mga residente nga nagapahayag nga pila na ka mga kaingod ang ginpangluthang-patay sang mga pirata.

 

Sa pagpangusisa sang kapulisan, naguwa nga sang nagligad nga gab-i pa may nagalapta nga text messages tuhoy sa pagpadulong sang mga pump boat nga nagasakay sang mga pugante gikan sa ciudad sang Tacloban rason nga nag-evacuate ang mga pumuluyo sang Purok Punta Roma sang Brgy. Old Sagay lakip na ang pila ka coastal barangays sa kaingod nga ciudad sang Escalante.

 

Suno kay Sagay chief-of-police Chief Inspector Edel Manzano, ila gin-verify ang amo nga report kun sa diin nasaksihan pa sini ang pagdinalagan sang mga pumuluyo apang ila na-establisar nga isa ini ka false alarm.

 

Natukiban nga nag-panic ang mga residente sang nakabati sang nagapadulong nga mga pump boat apang wala man sang may nagdungka.

 

Sa pihak nga negatibo ang report, wala nagakumpiyansa ang kapulisan kag nag-deploy sang isa ka hubon agud magbantay sa higad-baybayon.

 

Ginhingyo man ang mga residente nga gilayon ipalab-ot sa ila igtalupangod kun may magdungka nga mga dumuluong ukon mamutikan nga suspetyuso nga mga persona sa ila lugar