Injured	Killed
0	1

Date: 03 February 2013
Source: Bombo Radyo

BACOLOD CITY – Crime of passion!

Ini ang ginkomiter sang isa ka asawa matapos ginbuno-patay sini ang iya bana sang maaktuhan nga nagapakighilawas sa iya querida sadtong Biernes sang gab-i sa ciudad sang La Carlota.

Suno kay La Carlota Police Station Commander, Senior Inspector Eduardo Corpuz, pagkatapos ginkomiter ang krimen, gilayon nga nagsungka sa nasambit nga police station ang suspetsado nga si a certain Marites sang Central Tabao, banwa sang Valladolid sa diin gindala pa sini ang kutsilyo nga gingamit sa pagkomiter sang krimen.

Base sa imbestigasyon sang mga kapulisan, posible madugay na nga nagaduda ang asawa nga nagalu-ib ang iya bana nga si alyas Roberto Jr., 40 anyos, rason nga iya ini ginsundan sa iya gina-obrahan bilang isa ka driver sang truck sang tubo.

Ginapatihan nga hinali nga nanulom ang panulok sang suspetsado sang makit-an ang hublas sini nga bana nga nagasampaw sa iya querida sa sulod sang truck sa parking area sang Central Azucarera de La Carlota.

Nag-agom sang multiple stab wounds ang biktima rason nga ini ang gilayon nga ginbawian sang kabuhi.

Madasig naman nga nakapalagyo ang querida bangod sa kahadlok nga siya ang igasunod nga patyon.

Sa karon, yara sa state of shock ang asawa sa diin ini ang handa nga pasakaan sang kaso nga parricide sang La Carlota PNP.