USA ka minero nadala sa ospital human gipusil sa wa mailhing mga suspetsado sulod sa usa ka bunkhouse didto sa Sityo Butay, Barangay Pamintaran, lungsod sa Maragusan, Comval Province.

Giila ang biktima nga mao si Junrey Pol 23, molupyo sa Barangay Tambongon, lungsod sa Pantukan, samang lalawigan.

Sa report gikan Comval Province Police Provincial Office, nasayran nga nahitabo ang pagpamusil pasado alas 9:00 sa gabii niadtong Huwebes didto sa dapit.

Samtang didto sulod sa ilang bunkhouse ang biktima, nakig-istorya sa iyang mga kauban, kalit nga miabot ang wa mailhing mga lalaki.

Way daghang istorya gipusil ang biktima gamit ang wa pa matinong kalibre sa armas.

Naigo ang biktima sa nagkadaiyang parte sa iyang lawas.

Human sa insidente, dali sab nga misibat ang mga mamumuno.

Gidala sab dayon ang biktima sa usa ka ospital sa lungsod sa Maragusan.

Apan gibalhin kini sa Davao Regional Hospital sa siyudad sa Tagum tungod sa grabeng samad pinusilan nga naangkon.

Kapulisan sa lungsod sa Maragusan ang mihimo na og pakisusi sa insidente.

Pipila sa ilang gitun-an kun unsa ang motibo sa krimen, kinsa ang mga responsable sa pagpamusil. (Marvin Pineda)

Gipatik sa mantalaang SuperBalita Davao Mayo 30, 2010.