Injured	Killed
0	1

Date: 31 August 2013
Source: Bombo Radyo

ROXAS CITY – Patay ang isa ka 15-anyos nga menor de edad matapos luthangon ang kaugalingon sa sulod sang selda sang pulisya sa Poblacion Ivisan, Capiz.

 

Nauna diri, ginkustudiya sa Ivisan PNP station ang biktima nga si Edwin Torillo, residente sang Barangay Basiao sang nasambit nga banwa matapos iya ginsunog ang ila balay sang nagligad nga Agosto 25.

 

Apang bangud isa ka menor de edad kag ginapatihan nga may yara sang deperensiya sa paminsaron nadesisyunan sang Provincial Prosecutors Office nga iturn-over na lamang ini sa Department of Social Welfare and Development (DSWD).

 

Suno sa report, ginmanduan sang mga katapo sang Women and Children Protection Desk (WCPD) sang amu nga estasyon sang pulisya ang menor de edad nga kuhaon ang iya mga kagamitan sa selda agud madul-ong na ini sa talatapan sang DSWD.

 

Apang, nakibot ang mga pulis sang makabati sang isa ka lupok sang pusil nagikan sa nahamtangan sang menor de edad.

 

Kasunod sini, nasapwan nga duguon sa nawala nga dughan samtang may ginauyatan nga pusil si Torillo kag gilayon nga gindala sa Roxas Memorial Provincial Hospital kun sa diin ini ang gindeklarar nga dead on arrival.

 

Nahibaluan nga ang armas nga gingamit sang menor de edad sa pagluthang sa iya kaugalingon amu ang 9mm pistol nga service firearm ni PO2 John Cordovero nga myiembro sang patrol team sang Ivisan PNP.

 

Sa karun, nagapadayun ang imbestigasyon sang mga otoridad kun paano nagkadto sa menor de edad ang pusil ni PO2 Cordovero.