| Injured | Killed |
|---|---|
| 1 | 0 |
Date: 19 March 2013
Source: Sun Star Superbalita
Tungod sa utang sa gidiling drugas sa anak
INAHAN kritikal human gipusil sa usa ka wa mailhing lalaki sulod sa ilang panimalay sa Sitio Ubca, Barangay Quiot, dakbayan sa Sugbo, alas 11:20 sa buntag kagahapon.
Sumala sa kapulisan, gidudahang motibo sa pagpamusil mao ang giingong utang sa anak sa negosyo sa gidiling drugas apan naapil kini sa pagpamusil.
Si Fe Cansancio, 46, minyo ug nagpuyo sa nahisgotang dapit, talandugon ang kahimtang sulod sa usa ka tambalanan sa dakbayan human nakaangkog samad walang aping nga milapos sa tuong liog.
Samdan usab sa walang bukton ang iyang anak nga si Jonas, 26, usa ka construction worker, kinsa nakadagan dihang nakabantay sa lalaki nga nagdala og pusil nga nisulod sa ilang balay.
Ang lalaki nga namusil gihulagway nga nagpangidaron sa 20 anyos, puti-on, 5’5 ang gitas-on, nagsul-ob og kawo, nagt- shirt kinsa paspas nga nisibat human sa insedenti sakay sa usa ka habalhabal.
Si PO1 John Eric Samosa, imbestigador sa Homicide Section sa Cebu City Police Office (CCPO) nga nahinabi sa Sun.Star Superbalita, niingon nga drugas ang motibo sa krimen kini human si Jonas, kinsa target sa lalaki, niangkong nagnegosyo siya og gidiling drugas kaniadto ug wa siya makaabayad sa gikuha nga drugas.
Dugang sa imbestiasyon sa kapulisan, usa ka lalaki ang kalit nga niabot diha sa gawas sa gate sa balay ug nangita kang Jonas hinungdang gipukaw sa iyang inahan human natulog pa kini.
Sa paggawas ni Jonas, kalit lang nibunot sa iyang armas ang lalaki dayon namusil, apan nakabantay siya niini busa nidagan og balik sa pagsulod sa panimalay hinungdan nga naangol ang iyang inahan.
Ang lalaki nakaipsot ug wala na maabti sa kapulisan human nisakay gilayo’g habalhabal nga gimaniho ni Alfredo Rafols, 49, ulitawo ug nagpahatod sa eskina sa Punta Princesa.
Si Rafols, dihang giimbestigar sa kapulisan, hugtanong nihimakak nga may kalambigitan sa krimen sumala pa niini nga wala siya makahibalong dunay pagpamusil nga nahitabo sa sudlunong bahin sa sa maong lugar.
Wala sab siya makahibalo nga kadtong iyang pasahero mao diay ang responabli sa krimen, hinuon daghang nakaklaro sa panagway apan wala gyud naka-ila.
Usa ka kabhang sa kalibre .45, ug usa ka deform slug ang narekuber sa kapulisan didto sa crime scene.