Tuluyan nang mabubulok sa bilangguan ngayon ang isang 54-anyos na lolo makaraang tuluyan itong dakpin sa kasong rape.

Ayon kay S/Supt. Martin Gamba Jr., ang tagapagsalita ng CARAGA-PNP, kinilala ang nakakulong na ngayon na si Concordio Trinidad Binocilla, 54-an­yos, ng Purok 7, Bgy. Patin-ay, Prosperidad, Agusan del Sur.

Nadakip si Binocilla sa mismong tahanan nito dakong alas-8:40 ng gabi kamakalawa matapos ang operasyon ng pinagsanib na pwersa ng Prosperidad Municipal Police Station at Agusan del Sur Police Provincial Office Intelligence Operatives.

Base na rin ito sa inilabas na warrant of arrest ni Judge Hector Salise ng RTC Branch 6 (Prosperidad, Agusan del Sur) nang nakalipas na Pebrero 8, 2013 kaugnay sa kasong rape sa kaanak nito.