Injured	Killed
0	1

Date: 17 June 2013
Source: Bombo Radyo

KALIBO, Aklan – Ginhigtan anay ro daywang alima antes nga gintakawan ag pinatay ro sangka 64-anyos nga lola it owa pa nakilaea nga suspek sa Sitio Laguna, Barangay Cayangwan, Makato, Aklan.

 

Patay eon kat makita ro biktimang si Florentina Tumbagahan, owa it asawa, nagapautang it kwarta ukon may 5-6 business ag residente it nasambit nga lugar.

 

Base sa report, nakita sa likod nga parte it anang baeay ro biktima nga nakahigot it liston it sapatos ro mga alima nga nakatungtong sa anang ueo ag may igo it pagbuno sa anang likod.

 

Nasayuran nga naga-isaeahanon eamang ro biktimang naga-istar sa anang baeay.

 

Suno sa panaysayon ni Jennifer Ginoy, nag-agto imao sa baeay it biktima agud nga mag-utang kunta it kwarta, apang nakita nana ro duguan nga eawas it lola rason nga insigida nanda raya nga gin-report sa pulisya ro hitabu.

 

Nadiskubre man nga naduea ro belt bag it biktima nga ginasugid nga ginabutangan nana it anang kwarta.

 

Padayun pa ro ginapatigayon nga imbestigasyon it Makato PNP sa nasambit nga insidente.