Injured	Killed
0	0

Date: 31 May 2013
Source: Bombo Radyo

LAOAG CITY – Maysa nga agtawen ti 66 a lola iti Barangay 6, ciudad ti Laoag ti linoko dagiti kameng ti budul-budol gang iti mismo nga uneg ti pagtaengan ti biktima.

 

Iti palawag ti biktima a saanen a nainaganan iti PNP Laoag, dua a babbai ti nagturong iti balayna idi Mayo 5 ita a tawen no sadino a nagpabigbig dagiti suspek iti nagan a Maria Cristina Domingo ken Andie a taga BUlacan ken inyam-ammo da ti bagida a kabagian ti baket.

 

Segun iti biktima,nagtalinaed dagiti suspek iti balay na agingga ti Mayo 27 ken tunggal sumangpet da ket adda isangpet da nga adu a makan ken inggatangan da pay ti pagiddaan na rason nga inpagarupna a nasayaat da.

 

Nupay kasta, idi Mayo 27 kalpasan a rimuar dagiti suspek ket saandan a nagsubli agingga a naduktalan ti baket nga awanen ti kuwarta na a P50,000.

 

Kabayatanna, nagbalin met a biktima ti budul-budol gang ti maysa a saleslady ti maysa a boutique ni Shemalyn Daka, 22, balasang ken residente ti Barangay 18, ciudad ti Laoag.

 

Segun kenni Daka, maysa a babai nga agnagan ti Rose ti nangiyam-ammo iti bagina a gayyem ti amo ti biktima ken nakumbinsir ti babai ni Daka a nangala kadagiti lakona a blouses ken arwaten nga agbalor ti P20,000 ken dimmawat pay ti P4,000.

 

Nupay kasta, apaman a dimteng dagiti amona ket naduktalan na laengen a saanda nga am-ammo ti babai a nangiyam-ammo iti bagina a kas Rose.