Injured	Killed
0	0

Date: 01 June 2013
Source: Bombo Radyo

LAOAG CITY – Nasurok-kumurang dua gasut a ribo a pisos ti mapattapatta nga intaray dagiti holdupers a simrek iti LBC Express Padala iti Rizal St., Laoag City itay bigat.

 

Tallo a lalalki a nagpammarang a kliente ti simrek ken nagideklara ti hol-up iti sango ti kahera.

 

Kagiddan ti panangideklara da iti hol-up ti panangibilin da kadagiti amin a kliente ken empleado ti LBC nga agpakleb.

 

Kuna ni Mr ruben Ramos, manager ti LBC Express, a kabayatan a nakapakleb dagiti amin a tao iti uneg ket kinayumkom dagiti suspek dagiti kuarta iti kaha.

 

Kalpasan ti panangala da iti kuarta ket inbilin dagiti suspek kadagiti tao iti uneg a rummuar da iti ridaw iti likud kagiddan ti panaglibas da iti sango ti establismento.

 

Saan met a nadlaw dagiti tao iti ruar ti napasamak gapu iti kaawan ti serbisyo ti koryente ken nakarikep ti ridaw iti sango ti nahol-up nga establismento.

 

Maysa pay a suspek ti maipagarup a nagserbi a look-out iti ruar ti pasdek.