Injured	Killed
1	0

Date: 15 January 2013
Source: http://www.sunstar.com.ph/superbalita-cebu/balita/2013/01/15/langyaw-gipusil-kaduha-na-nga-gisuwayag-patay-263071

LANGYAW nasamad sa lubot human gipusil sa duha ka mga lalakeng nagmotorsiklo niadtong Lunes sa alas 8:30 sa gabii sa Sitio Tawi-Tawi Barangay Pob­lacion, lungsod sa Dalaguete, Sugbo.

Matod sa kapulisan nga ikaduha na kining higa­yon sa pagsuway pagpatay kang Peter Jozef Gorissen, 65, minyo, Dutch national, dunay kapuyo sa nahisgutang lugar.

Ang una niadtong Disyembre 4 sa miaging tuig apan nakalingkawas kay nikagar ang armas.

Luwas na hinuon ang iyang kahimtang sulod sa usa ka tambalanan.

Ang suspek giila sa kapulisan nga mao si Lorencio Dayaganon, taga Sitio Malakarong, Barangay Usmad, lungsod sa Argao, Sugbo.

Ang iyang kauban nga nagmotorsiklo wa pa mailhi.

Ang duha ka mga suspek nakasibat sa ginukdanay sa kapulisan.

Si SPO1 Veronico Centeno, desk officer sa Dala­guete Police Station, nga nahinabi sa Sun.Star Superbalita nagkanayon nga ang biktima gikan sa may plaza sa lungsod uban sa iyang kapuyo nga si Glorian Maria Riesel, 31, ingon man higala nga si Corazon Harthoorn.

Sa ilang pagpamauli, si Harthoon maoy nagmaniho sa sakyanan.

Sa pag-abot sa balay, nikanaog pag-una ang biktima ug gisundan sa iyang kapuyo ingon man ni Harthoon.

Kalit nga ni-abot ang suspek nga nagsakay sa motorsiklo sa tungod sa gate sa balay dayon nikanaog ug namusil makaduha ka mga higayon sa biktima ginamit ang kalibre .45 nga pistola.

Human sa pagpamusil, daling nisibat ang suspek sakay sa kulor puwa nga XRM samtang ang biktima gidala sa tambalanan.