SUGATAN ang 28-anyos na lalaki matapos pagsasaksakin ng kahati sa kinita sa pagsasanla sa Binondo, Maynila kagabi.

Halagang P50.00 ang muntik nang tumapos sa buhay ni Joselito Monreal, ng Block 17 Baseco Compound, Port Area, Maynila.

Nakatakas naman ang suspek na si Julius Espinosa, ng Baseco Compound.

Sa report, alas-7:10 nang saksakin ng suspek si Monreal sa Sto. Cristo, kanto ng Claro M. Recto Avenue, Binondo Maynila.

Nabatid na nagalit ang suspek matapos bigyan ni Monreal ng P50.00 bilang parte sa naisanlang cellpone sa halagang P250.00.

Nang balikan ng biktima ang suspek para gumanti ay naglabas ito ng patalim at saka ilang ulit na itinarak sa katawan ng biktima.