Injured	Killed
0	1

Date: 08 February 2013
Source: Bombo Radyo

TACLOBAN CITY – Padayon an iguindudumara nga imbestigasyon yana han Ormoc, City PNP bahin ha usa nga lalaki nga guintotoohan nga biktima hin salvage ha mao nga lugar.

Subay ha nahikay nga impormasyon han Bombo Radyo Taloban kan SPO2 Catalino Abueva, diri la guihapon nakikilala an lalaki nga nakita nga patay ha Sitio Jaubon, Brgy. San Isidro Ormoc City han naglabay nga adlaw.

Pagtotoo han mga otoridad nga biktima hin salvage an lalaki nga aada ha 22 ngada ha 26 anyos an pangidaron kon diin nakasul-ot ini hin color gray nga shirt, aada ha 5’2 ngada ha 5’4 an kahitas-on ngan isakto la an color han panit hini.

Waray guihapon ID o ano man nga gamit nga nakita ha mao nga biktima agud makilal-an ini.

Dugang pa ni SPO2 Abueva, brutal an pagkapatay ha mao nga biktima tungod nga haros mautod na an leug hini ngan may ada guihapon 12 nga samad binun-an ha dughan ngan likod nga parte han lawas hini.

Nahibaruan nga usa nga residente han mao nga sitio nga hi Emma Sevilla an nagreport ha mga otoridad kahuman nga makita an patay nga lawas han mao nga lalaki.

Nakita pa daw hini an usa nga sarakyan nga nakaparada ha mao nga lugar ugsa pa man makita an patay nga lawas, pero waray naman hini makuha an plate number.

Ha pagkayana in diri pa guihapon nakikilala an mga suspetsado nga pumatay ngan naglabog ha lalaki ha mao nga lugar.