NILANDING sa balay tambalanan ang usa ka lalaki human gipusil kagahapon mga alas 5:00 sa kadlawon sulod sa merkado sa Puerto ning siyudad sa Cagayan de Oro.

Giila ang biktima nga mao si Genaro Salvador, 50, minyo, sa susamang dapit.

Gitumbok nga suspetsado ang silingan nga mao si Lauriano Gonzales.

Si SPO3 Edgardo Saburao sa Police Station 6 (PS6) sa Puerto nibutyag sa Sun.Star SuperBalita nga daan na nga nagkabikil ang duha tungod sa personal nga away sa ilang mga anak. Apan niadtong tungora deretso nga gipusil si Salvador hinungdan sa pagkaigo sa iyang tiyan ug walang bahin sa paa niini.

Giresponde ang hitabo sa kapolisan sa PS6 ug buluntaryong mitahan sab ang suspek uban sa paghatag sa iyang kalibre 38 nga pistola.

Gidala sab ang biktima sa Northern Mindanao Medical Center (NMMC) kinsa kritikal ang kahimtang ning panahona.

Matud ni Saburao nga ang suspek trabaho mao ang pagpanul-id ug mga armas ug ang gigamit nga pistola gipanag-iyahan sa kostumer niini.

Nagtingkagol sa prisuhan si Gonzales kinsa gikatakdang pasakaan og kasong attempted murder human desidido ang pamilya sa biktima nga mopasaka og kaso.

Gipatik sa mantalaang SuperBalita Cagayan de Oro Mayo 31, 2010.