Injured	Killed
3	0

Date: 27 January 2013
Source: http://www.sunstar.com.ph/superbalita-davao/balita/2013/01/27/lalaki-gipusil-atubangan-sa-kapuyo-265066

USA ka lalaki ang gipusil atubangan sa kapuyo samtang nadamay ang laing usa ka tawo kinsa naglingkod sa nahitaboan sa krimen alas 3:30 sa kaadlawon niadtong Sabado.

Ang insidente nahitabo didto sa Purok 5, Isla Verde, Barangay 23-C Poblacion, siyudad sa Davao.

Ang biktima nailhan nga si Suhaily Manding, 23, usa ka barangay pulis ug residente sa Mini Forest, Barangay 23-C Poblacion.

Nasayran gikan sa spot report sa Sta. Ana Police Station nga padung na unta si Manding mouli sa ilang balay uban ang kapuyo niining si Analiza Basanez, apan pag-abot nila sa kanto Purok 5, miduol ang duha ka lalaki.

Ang usa mga lalaki naila sa pangalan nga alyas Poloy Pitao, residente sa Purok 5, Barangay 23-C Poblacion.

Gitionan sa suspek ang biktima sa wala matino nga pistola padung sa paa.

Nakaangkon og duha ka samad pinusilan ang biktima sa iyang paa, samtang nadamay si Wilmer Aboy Millomida, 39, minyo, welder, taga San Roque, Bangkal, ning siyudad.

Si Millomida naigo sa tuong kamot mao nga gidala sila Southern Philippines Medical Center diin padayon silang giatiman sa mga doktor.

Ang kapulisan padayong naniid sa dapit aron dakpon ang duha ka mga suspek. (Jeepy P. Compio)