Injured	Killed
1	0

Date: 05 July 2013
Source: Bombo Radyo

NAGA CITY – Arestado an sarong lalaki makalihis manghabon nin mga panabong na manok asin prubarang saksakon an sarong pulis digdi sa siudad nin Naga.

 

Binisto an suspetsado na si Marcial Regollano, 39 anyos asin residente kan Barangay Balatas sa nasaitang siudad.

 

Sa nakuang impormasyon kan Bombo Radyo Naga, napag-araman na mantang nagsasagibo nin Surveillance sa mga illegal connection an intelligence group kan PNP Naga asin pirang personahes kan CASURECO II sa Barangay Triangulo nakaresibe sinda nin impormasayon dapit sa panghahabon kan suspetsado sa mga panabong na manok.

 

Tulos man na nagresponde an mga otoridad asin naaktuhan an suspetsado sakay nin sarong bisikleta mantang dara-dara an 3 mga panabong na manok na pinagtutubodang ipapabarakal kaini.

 

Kan dadakupon na ini, bigla na sanan ining nagbunot nin kutsilyo asin pigprubaran na saksakon an saro sa mga pulis na nagresponde.

 

Maswerte man na dai tinamaan an pulis alagad bigla na sana ining duminulag hasta sa mapuli ini sa habulan.

 

Na-korner kan mga otoridad an suspetsado na aminado man sa krimeng saiyang ginibo.

 

Apwera sa kasong panghahabon posible man na mahampang si Regollano sa kasong Assault huli sa pagprubar na pananaksak sa sarong pulis.

 

Mientrastanto nasa kustodiya na kan pulisya an suspetsado maging an mga narekober na panabong na manok hale digdi.