| Injured | Killed |
|---|---|
| 0 | 1 |
Date: 17 January 2013
Source: http://www.sunstar.com.ph/superbalita-cebu/balita/2013/01/17/kawatan-gipatay-suspek-negusyante-263422
SUSPETSADONG kawatan gideklarar nga dead-on-arrival sa Cebu City Medical Center (CCMC) human gipusil sa usa ka negosyante kagahapon sa alas 9:30 sa buntag sa may Sitio Mahayahay, Barangay Calamba, dakbayan sa Sugbo.
Si Segundino Ytang, gibanabanang 25-30 anyos, taga Barangay Tuyan, dakbayan sa Naga, namatay human nakaangkon og samad pinusilan sa buko-buko.
Si Carlito Go, negusyante sa maong dapit, gisikop sa kapulisan human siyay gitumbok nga maoy nipusil patay sa biktima gawas sa iyang balay.
Si PO3 Victor Ruel Ayuman, imbestigador sa Homicide Section sa Cebu City Police Office (CCPO) nga nahinabi sa Sun.Star Superbalita, niingon nga duna silay witness nga nakakita sa suspek nga maoy namusil.
Ang suspek hugtanong nanghimakak sa maong krimen, samtang nagdumili sa pagtubag sa mga pangutana sa mga sakop sa media.
Nahibaw-an sa kapulisan nga ang suspek ingon man biktima dunay daang panagbangi nga maoy gituohang motibo sa krimen.
Ang kapulisan nakarekuber og duha ka mga slug sa wa pa matinong bala sa armas, samtang wa sab marekuber sa kapulisan ang armas nga gigamit sa suspek.
Kasong murder ang gi-andam sa kapulisan nga ipasaka batok kang Go.
Samtang sa laing hitabo, usa ka driver sa construction, talandugon ang kahimtang sulod sa CCMC human siya gipusil sa usa ka gwardiya sa Jamesville Subdivision mga alas 10 kagahapon sa buntag sa Barangay Lahug, dakbayan sa Sugbo.
Si Hub Tenchavez, 31, minyo taga Barangay Jaclupan, dakbayan sa Talisay, driver sa OIC Constructions, nakaangkon og samad pinusilan sa walang kilid sa lawas, paa ug bukton.
Nisibat si Samner Sabejon, taga Basak, dakbayan sa Lapulapu, sakop sa Sikatuna Security Agency.
Matod ni PO3 Ayuman nga dunay karaang panagbangi ang suspek ug biktima.
Ang biktima niabot sa lugar aron mag-deliver og materials hinungdan nga gihatag niini ang iyang identification (ID) card sa guwardiya sa guard house.
Sa pagbalik niini, iyang gihapit ang ID sa guard house nga gipangutana sa biktima og “nagbitbit lagi ka sa imong armas?”
Way daghang estorya gipusil ang biktima makadaghang higayon sa iyang lawas.
Human sa krimen ang suspek nikaratel sa pagdagan.
Nasuta nga ang duha nagkabangi kalabot sa ilang sistima nga gipatuman sa pagkuhag ID sa mga mosulod sa subdivision nga dunay mga priority number.