Injured	Killed
0	2

Date: 15 January 2013
Source: http://www.sunstar.com.ph/superbalita-davao/balita/2013/01/15/kapitan-gibanhigan-2-escorts-napatay-263038

KIDAPAWAN CITY — Duha ka escorts sa kapitan ang napatay sa pagpamanhig alas 6:30 kagahapon sa buntag didto sa probinsiya sa North Cotabato.

Giila ang mga biktima nga mao sila Takando Mamukao ug Muslimin Ampuan, pulos molupyo sa Sitio Patindiguen, Barangay Pantar, lungsod sa Banisilan.

Sa nahagpat nga taho gikan sa North Cotabato Provincial Police Office, nasayran nga nahitabo ang pagpamanhig samtang sakay ang mga biktima sa upat ka motorsiklo.

Kauban sa mga biktima ang grupo nila Barangay Chairman Sonny Kadil gikan sa ilang bay paingon sa korte sa Midsayap, North Cotabato.

Giingon nga giatangan ang mga biktima sa mga armadong lalaki nga gipangulohan ni Kumander Faron nga sakop sa Moro Islamic Liberation Front (MILF).

Way kaluoy nga gipamusil ang mga biktima hangtud nga namatay gamit ang tag-as nga matang sa armas.

Naluwas si Kadil dihang kusog niyang gipadagan ang motorsiklo nga iyang gisakyan paingon sa usa ka detachment sa militar ug Cafgu.

Napatay sa pagpamanhig mao sila Ampuan ug Mamukao nga mga security escorts ni Kadil nga nagsunod kaniya.

Nasayran nga sila Faron ug Kadil dugay nang nagkabikil tungod sa personal nga away sa ilang pamilya o rido sa yuta nga ilang giugmad.

Hinuon, gitahasan na ni Cotabato Governor Emilou “Lala” Taliño-Mendoza si Banisilan Mayor Betty Allado nga resulbahon ang away tali sa duha ka pamilya pinaagi sa malinawon nga negusasyon.