Injured	Killed
0	0

Date: 16 June 2013
Source: Bombo Radyo

KORONADAL CITY – Nagapadayon sa subong ang imbestigasyon sang mga otoridad sa nagluntad nga pagpanghaboy sang granada sa isa ka Husky bus samtang nagabiyahe sa national highway sa bahin sang Barangay Kamasi, Ampatuan, Maguindanao alas 10:30 kahapon sang aga.

 

Ginpahayag ni Ampatuan PNP Chief, Insp. Ronald Delion, nga gikan sa Cotabato kag padulong sa siyudad sang General Santos ang Husky bus nga may license plate number LVX 117 nga ginamaneho ni Nicor Jess Jabero nga residente sang Polomolok, South Cotabato sang ginhabuyan sang granada sang duha ka wala pa makilal-an nga mga lalaki.

 

Base sa panaysayon sang driver sang bus nga si Jabero, una niya nga nakit-an nga igahaboy na kuntani sang mga suspek ang granada rason nga gindasigan niya ang pagpadalagan sang amo nga bus nga nagresulta sang paglupok sang granada sa nalikod nga bahin sini.

 

Wala naman sang may napilasan nga mga pasahero sang bus magluwas sa mga lagub nga naangkon sang isa ka motorista kag kaupod sini nga naigo sang nagtabog nga bato.

 

Ginaistudyuhan naman sang mga otoridad ang insidente kun may kaangtanan sa nahauna nga pagpangluthang sa isa man ka Husky Bus sa Barangay Labu-labo, Datu Hoffer, Maguindanao ang insidente.