| Injured | Killed |
|---|---|
| 1 | 0 |
Date: 16 March 2013
Source: Sun Star Superbalita
ILEGAL nga sugal ang gitutukan nga motibo sa pag- ambush sa usa ka negosyante nga luwan sa iyang bag-ong awto nga BMW sa miaging hapon sa South Road Properties apan nakahimo pa sa pagpadagan hangtod sa may General Maxilom Avenue.
Ang biktima naluwas sa iyang asawa nga iyang natawgan ug napangayoan og pakitabang nga siya gipusil sa may SRP.
Pabiling naa sa pribadong tambalanan ang biktimang si Edgar Ho Lim, 49, taga General Maxilom Avenue, Barangay Zapatera, dakbayan sa Sugbo, tungod sa iyang samad sa tiyan ug apapangig.
Ang iyang abogado nireklamo sa mga pulis nga nisusi sa iyang awto bisan way search warrant.
Duha ka mga pakite nga gituohang shabu ug dakung kantidad sa salapi ang napalgan sa kapulisan sulod sa sakyanan.
Sa pasiuna nga imbestigasyon nga gihimo nila ni SPO4 Rey Cuyos ug mga kauban sa Homicide Section sa Cebu City Police Office nagbutyag nga ang biktima luwan sa iyang bag-ong sakyanan nga BMW nga wa pay plaka.
Sigun sa pasiuna nga imbestigasyon gikan siya sa habig sa Talisay City ug nisulod sa SRP padung sa downtown area.
Apan samtang diha pa siya sa SRP sa mga alas 5:05 sa hapon, nakatawag siya sa iyang asawa nga si Viola nga siya gipusil ug nihangyo nga magpasugat ug magpadala sa tambalanan.
Siya gisugat sa General Maxilom Avenue Extention duol sa nasunog nga tindahan ug nipahunong sa iyang awto tunga sa dalan.
Dali siyang nibalhin sa sakyanan sa iyang asawa nga mao nay nidala kaniya sa pribado nga tambalanan.
Atol sa pag-responde sa kapolisan, napalgan ang sakyanan ni Lim nga natusak-tusak sa mga bala ang windshield.
Anaa sulod sa sakyanan dapit sa dash board ang duha ka gagmay nga pakite sa gidudahan nga shabu, kwarta nga P35,000, ATM cards, 21 ka mga papel nga gilukot ug passbook sa banko ug usa ka manok nga igtatari nga diha sulod sa baggage compartment.
Samtang si manlalaban Noel Archival, abogado ni Lim, nireklamo sa gibuhat sa mga pulis nga pagsiksik sa iyang sakyanan nga way search warrant.
Apan si CCPO Director Mariano Natuel niingon nga wa na kini kinahanglana kay ma- consider crime scene ang awto.
“Ang awto is a crime scene. Ang pulis has the right to search everything,” dugang ni Natuel.
Samtang si Chief Inspector Romeo Santander, hepe sa City Intelligence Branch, nagduda nga dunay gikabanging laing financier si Lim hinungdan nga siya gisuwayan sa pagpatay.
Apan iyang gitataw nga ila pang hinabion si Lim, kinsa nasikop sa usa ka ronda sa miaging buwan tungod sa illegal numbers game. Ang biktima gawasnon kay nakapiyansa.