ISANG hinihinalang miyembro ng isang carjacking group ang nabaril at napatay ng mga pulis kaninang tanghali sa Quezon City.

Sa report ng GMA News, bumangga ang kulay green na Pajero ng suspek sa isang taxi sa kanto ng Road 8 at Alley 1 sa Project 6 na siyang naging dahilan ng matinding traffic doon.

Sinusubukan naman ngayon ng pulisya na mahagilap ang may dalawa pang suspek na nagawa raw makatakas pagkatapos ng engkuwentro.

Sa kasalukuyan ay hindi pa nakikilala ang namatay na suspek.  Nakasuot ito ng kulay pink na pang-itaas at gun holster.

“Initially operation ng Highway Patrol Group ng Region 3. Nakipag-coordinate sila sa element namin ng ANCAR sa area namin. Ngayon ang operation successful, then afterwards ang ibang suspects on foot sila nakatakas,” ayon sa isang SPO4 Dela Cruz.

Nabatid na nakipag-palitan ng putok ng baril ang mga suspek sa mga pulis hanggang bumangga ang sinasakyang Pajero ng mga ito sa isang taxi.

Nang suriin ang Pajero ay napansin ang mga tama ng bala sa harapan nito.