Injured	Killed
0	0

Date: 04 July 2013
Source: Bombo Radyo

ROXAS CITY – Nabutang sa kontrobersiya ang guidance counselor sang isa ka buluthuan nga pang-elementarya sa banwa sang Jamindan matapos ginpahug ang isa ka estudyante nga ginpasibangdan nga nagkawat sang kwarta.

 

Ginreklamo sa pulisya sang ginikanan sang isa ka 15-anyos nga estudyante nga nakilala nga si Edna, ang guidance counselor nga si Ken Rey Lopez sang Jamindan Elementary School.

 

Nakapagkit sa reklamo ang pagpamahug ni Lopez nga ma-priso ang menor de edad sa ti-on nga indi mabayaran ang nadula nga P1,500 nga kwarta sang isa pa ka estudyante.

 

Ginkadismaya dugang sang ginikanan ni Edna ang pagdumili sang guidance counselor nga magsulod ini sa eskwelahan tubtob nga indi mabayaran ang katunga nga kantidad nga nagadangat sa P750.

 

Nagpanindugan naman si Edna nga ginbalik sini ang nasambit nga kantidad gikan sa classmate nga si Lisette sang pilit nga ginpatago sa iya.

 

Suno kay Edna, nakuha ni Lisette ang nasambit nga kwarta matapos nagbinutig sa iya lolo nga gamiton ang kantidad sa pagkadto sa Boracay Island.