Injured	Killed
0	1

Date: 30 November 2013
Source: Bombo Radyo

BACOLOD CITY – Patay na sang masapwan ang isa ka ginang sa probinsya sang Negros Occidental matapos ginhimuslan kag ginbuno.

 

Ginkilala ang biktima nga si Aina Tucayon, 36-anyos kag residente sang Brgy. Minuyan, Murcia.

 

Base sa imbestigasyon sang kapulisan, nagpamakal sang ulutanon kag mga prutas ang biktima sa kaingod Barangay sang Mailum sa ciudad sang Bago agod ibaligya man sa ila lugar kahapon apang wala na nakapauli tubtub kagab-i.

 

Kaina sang aga lang nila nasapwan nga patay na sa kampo sang tubo nga may pito ka pilas sang pagbuno sa lawas kag positibo nga ginhimuslan.

 

Nadakpan naman gilayon ang suspetsado nga ginkilala kay Romulo Suspicio residente sang nasambit man nga lugar.

 

Suno kay Punong Barangay Roger Torres sang Barangay Mailum, mismo ang suspetsado ang nagpahibalo bangod nag-estorya pa ini sa krimen nga iya nahimo.

 

Base sa panaysayon sang isa ka testigo, nag-inom kahapon ang susptesado antes naglisensiya nga makato sa bukid agod magpangita sang bunga sang saging.

 

Sa iya pagbalik sang hapon na may dala ini nga saging apang wala na sang bayo kag may mga dugo sa lawas.

 

Bangod hubog, nag-estorya ini nga may ginpatay siya sa isa ka payag apang wala nila ginsapak apang bangod magahod, ginhubog ini sang mga naga-inom-inom agod makatulugan.

 

Kaina lang sang aga sang ila nahibaluan ang pagkasapo sa bangkay ni Tacuyon rason nga nakasiling ang testigo nga matuod ang gin-estorya ni Suspicio rason nga nag report ini sa kapulisan kag gilayon nga gindakop ang suspetsado nga nagakatulog pa.

 

Ginapatihan nga nasugata sang suspetsado ang buktima sa bukid samtang nagapangita sang saging kag iya ini ginhimuslan apang nagbato rason nga iya ini ginpatay kag gintapok sa kampo sang tubo.