Injured	Killed
0	1

Date: 04 July 2013
Source: Banat

CEBU, Philippines – Naglunang sa kaugalingong dugo ang usa ka babaye kansang  lawas  nabulit  sa mga  samad  dinunggaban didto  sa Viewhills subdivision, sa  barangay  Quiot, dakbayan  sa Sugbo  pasado  alas 4:00  sa kaadlawon  kagahapon.

Ang biktima nailhan nga si Jeysel Muñoz, 25, lumad   sa  Getafe, Bohol   apan   kasamtangan kini nga nagpuyo sa maong dapit.

Samtang ang gitumbok nga suspetsado mao si Benedicto Logrino, 40, molupyo sa maong dapit.

Ang kauban  sa  biktima nga si Lynlyn De Asis, mi-alegar  nga sa wala pa nahitabo ang pagpanunggab  iyang nadunggan nga nangayo og pasaylo ang biktima ngadto sa suspek   gumikan  sa paghagit-hagit   niini  nga makighilawas kaniya.

“Katong babaye, nag-ingun man nga ayaw gud Pekto, pasayloa na lang gud ko og nakaana ko sa imo nga maghilawas tah”, matud pa ni De Asis.

Dugang pa ni De Asis nga bag-ohay pa lang ang duha nga nagkaila  gikatahong gihagit sa biktima ang suspetsado nga makighilawas kaniya. Milabay ang  mga semana, giingong ang suspek na usab ang gikatahong mihagit sa biktima nga makighilawas apan wala mosugot ang biktima nga maoy napanglantawan nga posibling hinungdan sa maong insidenti.

Gihulagway usab ni De Asis nga dihang milampus  ang suspetsado   pagpanglugos  sa biktima giingong gibaharan niini ang  biktima nga dili pasumbongon   ni  bisan  kinsa  kalabot  sa nahitabo  kaniya.

Apan giingong ang biktima dali  nga  nangayo og tabang ngadto   ni  De  Asis pinaagi  sa   pagsulod  niini sa  iyang lawak.

Gani  tungod  sa kasuko sa suspek  naguba   ang ilang pultahan ni De  Asis tungod kay gilangkat kini sa suspetsado   nga  migukod  sa  biktima.

Apan  dugang  pa  ni  De  Asis  nga ang biktima dali usab nga nakadagan agi sa bintana sa maong boarding house diin  siya  mamatay.

Dugang alegasyon ni De Asis nga ang biktima tiggamitan og ginadiling drugas uban sa suspetsado ug gani, ang biktima ug ang suspetsado magkuyog  kun mag-inom sa maong dapit.

Ang inahan   sa biktima nga si Rowena Puerin hilabihang dangoyngoy  og  hilak nga nakakita sa iyang anak nga susama sa wala nay sapot.

Matud pa sa inahan nga taud-taud nang mibiya ang iyang anak sa ilang   balay human   kini nadismaya  sa nahitabo niini ug sa iyang bana.

Ang biktima giingong adunay anak nga nagpangidaron og 8-anyos, ug 4-anyos nga anaa sa inahan sa biktima.

Sa pakighinabi sa Banat News ni PO1 Reoful Adalim sa Homicide Section, mipadayag   nga ilang nasuta nga nagsul-ob og nipis  nga sapot  ang biktima ug may panty   pa, apan ang  gisul-ob  niini giingong nahubo na ug gani nakita ang taas nga bahin sa iyang lawas.

Dugang pa ni Adalim nga samad dinunggaban sa nagkadaiyang parti sa lawas  sa  biktima maoy  ilang  nakita  niini ug gani, dakong samad  sa tunga-tunga nga bahin sa dughan sa biktima ang nasud-ong  sa kapolisan.

Ang kapolisan padayon pa usab  sa pagsuta kun unsa gayud ang hinungdan sa pagpanunggab sa suspetsado ngadto sa biktima. (BANAT NEWS)