Injured	Killed
0	1

Date: 31 August 2013
Source: Bombo Radyo

NAGA CITY – Gadan an sarong persona mantang lugadan man an saro pa sa nangyaring pananaksak kan sarong empleyadong tinanggal sa trabaho sa banwaan nin Bato, Camarines Sur.

 

Binisto an binawian nin buhay na si Johny James Roaring, 29-anyos mantang an lugadan man iyo si Louella Argarin, live-in partner kan tugang ni Johny na anas mga residente kan Zone 5, Barangay San Vicente sa nasambitang banwaan.

 

Binsito man an suspetsado na si Rick Ryan Jason Buendia, 23-anyos asin residente kan Barangay Palo sa parehong banwaan.

 

Sa intribista kan Bombo Radyo Naga ki PC/Insp. Amado Montaña, hepe kan PNP-Bato, sinabi kaini na matinding anggot an motibo ni Buendia sa ginibong krimen huli sa pagkakatanggal kaini sa trabaho komo driver kan delivery vehicle kan negosyo kan pamilya Roaring.

 

Napag-araman kayang lubog na ini sa utang sa among si Rosa, ina kan biktimang si Johny James.

 

Huli kaini, suminugod an suspetsadi sa harong kan amo kaini alagad dai naabutan kun kaya napagdiskitahan an mga taong nasa laog kan harong.

 

Mayong anu-ano, pinagsasaksak suboot kan suspetsado si Johny James na nagsapo nin pirang tama nin saksak sa liog asin kili-kili mantang nagsapo man nin saksak sa tulak si Louella.

 

Marhay na sana suboot uminabot an tugang ni Louella na si Ramil asin pinukpok sa payo an suspetsado na naging dalan tangani na ini an maarestar.

 

Idinalagan pa suboot sa ospital si Johny James alagad ipigdeklarang dead on arrival mantang nagpapaomay pa ngonian sa ospital si Louella matapos isinairarom sa operasyon.

 

Mientrastanto nasa kustodiya na kan pulisya an suspetsado na nahahamapng na ngonian sa magkasabay na kasong murder asin frustrated murder.