Injured	Killed
0	1

Date: 26 March 2013
Source: Bombo Radyo

BACOLOD CITY – Patay ang isa ka bag-o lang guid naggradwar sa elementarya nga estudyante matapos ginluthang sang ex-CAFGU sa Purok Lantawan, Brgy. Guimbalaon, ciudad sang Silay, kagab-I.

Ang biktima ang ginkilala kay Janus Espinosa, 14 anyos kag residente sang nasambit man nga lugar.

Suno kay PO2 Hazel Dorado sang Women and Children Protection Desk sang Silay City PNP, nag-agom ang biktima sang fatal nga mga kapilasan sa kilid kag likod nga naglusot pa ang bala sa dughan sini.

Ginkilala naman ang suspetsado nga si Irish Victor Caro sang amo man nga lugar.

Base sa imbestigasyon sang Silay City PNP, mga las 8 kagab-I, matapos nagkuha sang ginlawig nga kanding ang biktima kaupod ang iya 13-anyos nga utod, ini ang ginbantayan sang suspetsado kag ginluthang.

Maswerte naman nga nakapalagyo ang 13-anyos nga utod sini nga nakapanago pa sa likod sang bato.

Nakit-an naman sang utod sang biktima ang ginhimo nga pagpangluthang sa iya utod sa diin apisar natumba na ang biktima, ini ang ginluthang sa guihapon sang suspetsado.

Nahibaluan man nga antes nagluntad ang insidente, una na nga ginpahog kag gintayaan sang suspetsado ang biktima sang armas-luthang sadtong Lunes matapos ginsugo ini sang iya manunudlo nga magsaka sa lubi nga amo naman ang ginabantayan ni Caro.

Ini ang gilayon man nga ginpabarangay kag ginpabalhag sang ginikanan sang biktima apang wala ini ginsipot sang suspetsado.

Sa karun, nahunong sa Silay City PNP ang suspetsado matapos nadakpan kaina sang hapon sa nasambit man nga lugar.

Samtang, indi pa man matumod sang mga kapulisan kon ano nga armas ang gingamit sini sa pagluthang-patay kay Espinosa bangod ginahulat pa ang resulta sang autopsy.